அன்புள்ள தங்கைக்கு...

நன்றியுடன் நடப்போம்...


அன்புள்ள தங்கைக்கு,

அஸ்ஸலாமு அலைக்கும் (வரஹ்..)

நான் உன் வீட்டில் இருந்த நேரத்தில் நீ சிலசமயம் நம் மச்சானுடன் பேசும் விதத்தில் மிகப்பெரும் குறையைக் கண்டேன். அடிக்கடி நீ அவரிடம் “என்ன செய்து விட்டீர்கள்? என்று பேசினாய். இது சரியான வார்த்தை அல்ல.

கணவன்-மனைவியிடையே சண்டை ஏற்படுவது சகஜம்தான். சண்டைபோடும் போதுகூட இது போன்ற வார்த்தைகளை பயன்படுத்தக் கூடாது எனும்போது, நீ சாதரணமாக பேசும் போதுகூட இந்த வார்த்தையை பயன்படுத்தியது சரியல்ல!.

தம்பதியரிடையே கருத்துப் பிணக்கும், வாய் தகராறும் ஏற்படுவது சில சமயம் ஆரோக்கியமாகவே இருக்கும். இது ஆரோக்கியமாக இருக்கும்வரை எந்த சங்கடத்தையும் ஏற்படுத்தாது.

சில வீடுகளின் கணவன் நல்லவிதமாக தன் மனைவியிடம் நடந்து கொண்டாலும் கூட, சில சமயங்களில் கணவனை புண்படுத்தும் வகையில் மனைவி பேசிவிடுகிறாள்.

சிறுசிறு பிரச்சினைகளில் ஏற்படும் பிணக்கு, காலப்போக்கில் பெரியதாக வெடிக்கும் போது கணவனை தரக்குறைவாக பேசும் நிலைக்கு சில மனைவியர் வந்து விடுகின்றனர்.

கணவனிடம் அதிக உரிமை எடுத்துக் கொள்ள துவங்கும் சில மனைவியர் அவனை ஆட்டிப்படைக்கும் ஆணவப் போக்குடையவர்களாக மாறுகின்றனர்.

சில வீடுகளில் கணவன் மூலமே பிரச்சினை ஏற்படுவதும் உண்டு. “மோகம் முப்பதுநாள், ஆசை அறுபது நாள்” என்று கூறுவர் இதை உண்மைபடுத்தும் வகையில் தன் கணவன் நடந்து கொண்டதும், அவன் மீது எரிச்சல் படத்துவங்கும் மனைவி, கணவனை கீழ்தரமாக பேச ஆரம்பித்து விடுகிறாள்.

இதுபோல் கூட்டுக்குடும்பம் என்ற பெயரில் வாழும்போது தம்பதியரின் நலனை திருமணமான புதிதில் சுற்றிஇருப்போர் ஆர்வம் காட்டினாலும், காலம் சிறிது சென்றதும் தம்பதியர் தனித்து இருந்தால் கூட எரிச்சலுடன் பார்க்கத் துவங்குவர். உடலுறவில் ஈடுபட்டால் குளிக்க வேண்டியது வருமே இதனால் மாமியார், நாத்தனார் ஒரு மாதிரியாகப் பார்ப்பார்களே என்ற காரணத்தைக்காட்டியே உடலுறவுக்கு மறுக்கத்துவங்கும் மனைவி இறுதியில் கணவனிடமிருந்தும் படுக்கையிலிருந்தும் பிரிந்து, கணவனை எரிச்சலுடன் பார்க்கத் துவங்கிவிடுகிறாள்.

சில தம்பதியர் திருமணமான புதிதில் ஒருவருக்கொருவர் அன்பு காட்டுவதுபோல் இருந்தாலும் காலப்போக்கில் தொய்வுவிழுகிறது. உதாரணமாக, குழந்தை பிறந்ததும் குழந்தை வளர்ப்பில் உள்ள ஆர்வம் காரணமாக தன் கணவனை ஒதுக்கிவைக்க முயலும் மனைவியர், காலப்போக்கில் கணவனை புறக்கணிக்க துவங்கி விடுகின்றனர்.

கணவனை எரிச்சலுடன் பார்க்கத் துவங்கி, சண்டை தான் வாழ்க்கை என்றாகிவிடுவர் பெண்கள். நாகரீகம் கருதி, மானம்மரியாதையைக் கருதி மனைவியின் ஏச்சையும், பேச்சையும் பொறுத்துக்கொள்கிறான் கணவன்.

நரகத்தில் உள்ளோரில் பலரை பெண்களாகத் தான் கண்டேன் அவர்கள் தங்களின் கணவனுக்கு (விசுவாசமின்றி நன்றி மறந்து) மாறு செய்வதே (இதற்குக் காரணமாகும்) அப்பெண்கள் காலம் முழுவதும் உன்னிடம் நன்மையை அடந்தாலும், உம்மிடம் குறையைக் கண்டு விட்டால் “ உம்மிடம் அறவே (இதுவரை) நான் நல்லதையே கண்டதில்லை” என்று நபி(ஸல்) கூறியதாக இப்னு அப்பாஸ்(ரலி) அறிவிக்கின்றார்கள். (புகாரி)

கணவனிடம் ஒரு மாதிரி பேசத்துவங்கி, பிறகு மனதை நோகடித்துப் பேசி, இறுதியில் விசுவாசமின்றி, நன்றி மறந்து நடந்தால் நரகம் உறுதி என்பதை கவனத்தில் கொள். கணவரை தரம்தாழ்த்தி பேசும் முறையை மேற்கொள்ளாதே!.

அன்புடன். உன் அண்ணன்.

நன்றி : மக்கள் உரிமை