வயது கல்விக்குத் தடையா? 53 வயதில் 10 ஆம் வகுப்புத் தேர்வு!

கல்வி கற்க வயது ஒரு தடையில்லை என்பதைத் தன்னம்பிக்கையுடன் தன் 53வது வயதில், பத்தாம் வகுப்பு பொதுத்தேர்வு எழுதும் பெண் ஒருவர் நிரூபிக்கிறார்.

கேரளா மாநிலம், கொழிஞ்சம்பாறையைச் சேர்ந்தவர் செண்பகாதேவி; வயது 53. இவர், தமிழ் வழியில் பத்தாம் வகுப்பு பொதுத்தேர்வை, பொள்ளாச்சி நகராட்சி பெண்கள் மேல்நிலைப் பள்ளியில் எழுதி வருகிறார். பேரக்குழந்தைகளுடன் தொலைக்காட்சி மெகா தொடர்களிலும் மூழ்கிப் போகும் வயதில் பத்தாம் வகுப்புத் தேர்வு எழுத வந்திருக்கும் திருமதி செண்பகாதேவியிடம் செய்தியாளர்கள் ஆச்சரியமாக கேள்வி எழுப்பிய போது, "தொடர்ந்து படிக்கும் ஆர்வம் இருந்தது; இளம் பருவத்தில் அதற்கு இயலாமல் போய் விட்டது. இப்போது சந்தர்ப்பம் கிடைத்ததால் படிக்கிறேன்" என்றுள்ளார்.

அவர் மேலும் கூறும் போது, "பொள்ளாச்சியில் ஒன்பதாம் வகுப்பு வரை படித்தேன். அதன்பின், வீட்டில் படிக்க அனுமதிக்கவில்லை. எனது 17ம் வயதில் திருமணம் நடந்தது. கணவரின் சொந்த ஊர் கொழிஞ்சம்பாறை என்பதால் அங்கு சென்று விட்டேன். அதன்பின், படிக்கும் வாய்ப்புகள் கிடைக்கவில்லை. இந்தியும், மலையாளமும் டியூஷன் மூலம் கற்றேன்.

எனது கணவர் ஜெகதீசன், 10ம் வகுப்பு வரை படித்துவிட்டு விவசாயம் செய்கிறார். மகள் பி.எட்., படித்து தனியார் பள்ளியில் ஆசிரியராக பணியாற்றுகிறார். மகன் எம்.பி.ஏ., படித்து, சொந்தமாக வியாபாரம் செய்கிறார். எனக்குப் படிக்க வேண்டும் என்ற ஆசை இருந்தது; குடும்பத்தார், என்னை ஊக்கப்படுத்தினர். மூன்றாண்டுகளாக பத்தாம் வகுப்புக்குத் தேவையான புத்தகங்களை வாங்கிப் படித்து வந்தேன்.

கணக்கு, அறிவியல் உள்ளிட்ட பாடங்களுக்காக, கேரளாவிலுள்ள தனியார் டியூஷன் சென்டரில் வகுப்புகளுக்குச் சென்றேன். தினமும் மூன்று மணி நேரம் படிப்பதற்காக ஒதுக்குகிறேன். பத்தாம் வகுப்பு தேர்ச்சி பெற்று, பட்டப்படிப்பும், கம்ப்யூட்டர் சார்ந்த படிப்பும் படிக்க வேண்டும் என்ற ஆர்வமுள்ளது" என்று படிப்பின் மீதான தன் ஆர்வத்தை மகிழ்ச்சியுடன் வெளிப்படுத்துகின்றார்.

நன்றி : இந்நேரம்